Бразилийн нэрт зохиолч Пауло Коэльо 1947 оны 8-р сарын 24-нд Рио-де-Жанейро хотод төржээ. Тэрээр өсвөр наснаасаа эхлэн зохиолч болохыг мөрөөддөг байсан бөгөөд энэ тухайгаа ээждээ хэлээд эрс эсэргүүцэлтэй тулгарсан байна. Түүнийг 17 настай байхад эцэг эх нь сэтгэл мэдрэлийн эмнэлэгт хэвтүүлэн 'эмчүүлэх' гэж оролдсон ба 3 жилийн дараа 20 настай Пуало Коэльо хүсэл мөрөөдлөө орхин эцэг эхийнхээ шахалтаар хуулийн сургуульд суралцах болов. Гэвч жилийн дараа сургуулиа хаяж, хиппи амьдралын замыг сонгосон бөгөөд Өмнөд, Хойд Америк, Мексик, Европоор хэрэн тэнүүчилж, 1960-аад оны үед хар тамхи хүртэл татаж байжээ. Бразилд буцаж ирснийхээ дараа тэрбээр дууны шүлэг бичих болсон ч 1974 онд түүнийг хорлон сүйтгэх агуулгатай шүлэг бичсэн хэмээн баривчилжээ. 1986 онд Коэльо Испаний баруун хойд нутагт орших Сантьяго-де-Компостелын замаар 800 гаруй километр явган аялал хийсэн бөгөөд энэхүү аяллынхаа дараа 'Бадарчин' хэмээх намтарчилсан зохиол бичжээ. Жилийн дараа хамгийн алдартай бүтээл болох 'Алхимич'-аа бичсэн нь Бразилийн төдийгүй олон улсын бестселлер болж, дэлхийн 67 орны хэлээр хөрвүүлэгдэн, 65 сая хувь борлогдсон ба зохиогч нь амьд ахуй цагт хамгийн олон орны хэлээр орчуулагдсан бүтээлээр шалгарч, Геннисийн номонд бичигджээ. Үүний дараа тэрээр өөрийн намтраар 'Валькари' '1992', 'Алеф' '2010', туулсан амьдралын туршлага дээрээ үндэслэн 'Брида' '1990', 'Мактаб', 'Эрэг дээр нь уйлж суусан Пьедра гол минь' '1994', 'Тав дахь уул' '1996', 'Вероника үхэхээр шийдсэн нь' '1998', '11 минут' '2003', 'Захир' '2005', 'Портобеллогийн шулам' '2006', 'Ялагч ганцаараа зогсдог юм' '2008', 'Аккрагаас олдсон гар бичмэл' '2012', 'Завхайрал' '2014' зэрэг уран зөгнөлт зохиолууд бичсэн юм. Пуало Коэльо 30 гаруй ном хэвлүүлсэн бөгөөд түүний зохиолууд нийтдээ 170 гаруй орны хэлээр орчуулагдаж, 175 сая хувь борлогдсон байна.