ШУА-ийн Түүх, угсаатны зүйн хүрээлэн, МУИС-ийн ШУ-ны сургуулийн Хүмүүнлэг, Нийгмийн ухааны салбарын хамтын энэхүү бүтээл нь агуулгын хувьд Э.Равданы сүүлийн 20-од жилийн дотор хэвлэн нийтлүүлсэн "Дэлхийд тархсан Монгол газар нутгийн нэр", "Их Монгол гүрний хот, балгадын товчоон", "Монголын нууц товчоон дахь газар нутгийн нэр судлал", "Их Монгол гүрний түүх-газарзүйн нэвтэрхий толь" бүтээлийн зүй ёсны нэгэн үргэлжлэл болой. Үүгээр эмхэтгэгч миний оюуны хүч тэнхээ хүрэх хэмжээнд дунд эртний Их Монгол улсын түүхийн нэгхэн үеийг их, бага хэмжээгээр илэрхийлмээр аядлаа. Уг бүтээл Араб, Сири, Перс, Хятад, Армян, Гүрж, Франц, Итали, Польш, Мажаар зэрэг хэл аялгуунд XIII-XIV зууны үед их хаан, түүний алтан ургийнхны аян дайнд оролцож явсан, их гүрний албанд алба хааж байсан зэрэг хаад, ноёд, судлаачид, жуулчид зэргийн 65 эх сурвалжаас Монголын түүхтэй холбоотой чухам хэсгийг нь түүвэрлэн сонгож оруулав. Энэхүү бүтээл нь их гүрнийхээ үүх түүхийг судалдаг, сонирхдог нийт хүнд зориулав.